Du befindest dich auf einer für Suchmaschinen optimierten Archive-Page!
Check diesen Beitrag auf unserer richtiger Page in schönem Design unter : "RAP IN DEN BERGEN"


Sheikong
06.12.2003, 15:49
hey leude
jetzt steit de gly wieder d'wintersaison vor dr hustür und ä grossä teil vo üs pilgeret wiä jedes jahr uf dr suechi nach früschem powder id bärgä. doch was muess mä dört obä mit schreckä feschtstellä? es manglet goppfertaminomau eifach a fettä partys, wo gueti musig ufgleit wird. bis jetzt fingsch regelmässig hochstehendi aläss würklech numä grad ds laax oder ds davos.
aber wiä gsehts de zum bispiel im bärner oberland us?
äs paradeexempel für di musikalischi verarmig isch dadrby grindelwald ir jungfrouregion. jedä winter isch ds dorf gschtungget voll mit jungä partywildä snöber und skifahrer. doch für au diä chunnt späteschtens am erschtä abä diä grossi ernüchterig. im dorf hets nämlech numä ei partyschuppä und i däm wird so hirnrissigä bullshit ufgleit, dass es scho fasch nüm aus musig betitlä darfsch.
ergo blybä dr zwöi möglächkeitä um trotzdäm no a fetti party i däm bärgdorf ds erläbä: entweder du schleppsch säuber äs gigantisches soundsystem und diä entsprächendi partycrowd mit inä feriähüttä u schiebsch de sozägä ä privati egofuer oder du füllsch dr de techu därmassä, dass stockbsoffä trotzdäm i einzig schundschuppä inätorklisch und dr när party im vollsuff no geil inächunnt. dadrzue muess gseit wärdä, dass diä zwöiti variantä sogar fasch türer isch (verdammti alkprisä dört obä!)aber idä meischtä fäu zur awändig chunnt.
ig persönläch bi überzügt dass däm eländä bärgalkoholismus ;) mit fettem rap oder heissem danchall ä rigu vorgschobä wärdä chönnt. d'ärtzt dört obä hättä chly meh zyt zum chillä und wenn vom usgang heichämsch müesstisch nümme geng luegä dass nid über ä igfroreni alklichä stolperisch. aber im ärnscht. d'lüt wo sich abä für abä i diä spärläch gsäitä clubs quetschä würdä zu guetem räp, reggae oder dancehall sicher x-mal steiler abgah als zum bishärigä bullshit.

drum mi persönlech ufruef a aui wo im musig-biz öppis bewirkä chöi:

VERASTALTET DOCH BITTE BITTE IDÄ BÄRGÄ VERMEHRT MAU SO GEILI PARTYS UND KONZÄRT, WIÄ MR SÄ IDR STADT GNIESSÄ DÖRFFÄ!!

Es git unzähligi lüt wo euchi musig liäbä und idä bärgä stark uf entzug läbä müessä. und ou dir müesst mr zuestimmä, wenn i sägä:
äs git nüt geilers aus nachämänä perfektä powdertägli am abä mit dr ganzä meutä anäs dicks rap-konzärt oder ä brönnendi danchall-night ds gah und ä nacht lang abzflashä!:blingblin
und wenn i grad scho drby bi. warum nid mau ä art splash uf dr chlynä scheidegg :kiffer:

so jetzt heit dr mini persönlechi sicht zur lage der nation.
doch was isch euri meinig????
findet dr ou d' rapszenä sötti no viel sterker presänz idä bärgä markierä? hei dörfer wiä grindelwald, adelbodä, meiringä, etc.etc....nid ou äs rächt uf gueti musig?
oder sit dr eher dr meiniig, dass es wiä bishär doch guet gsi isch und mä haud nid immer dr füfer und ds weggli ha cha, sprich geili rapnächt und dancehallsessions numä ir stadt erläbt und sich drfür idä bärgä würklech 24h äm powder widmä söll? :hmmm:

Bloodstar
06.12.2003, 17:06
rächt hesch!

chegg:

greis, poul prügu und link am 26.dez ir taverne adelbode

wurzel 5 am 27. dez in laax

greis, poul & link am 21. januar im hotel eden arosa

wurzel 5 am 18.februar im eden arosa

wurzel 5 am 21.februar ir taverne adelbode

gulewej!

rm
06.12.2003, 20:12
open airs a snowboard contests sind e s geilschtä.

:dance:

mary
06.12.2003, 22:33
i tuä bi dä marketinglüüt vo lenzerheide bergbahnen mal äs guäts wörtli iilegä.wär ächt cool,wäns z.b. bim NACHTSNOWBOARDE anstatt ländler- und hitparade-partys mal ebä ä HIPHOP-PARTY odär so git.
letsht jahr hämmär snowparade gha,also streetparade ufem shnee,mit pistebullys..vo däm här söt ja äigäntli au was wiä HIPHOP OPENAIR IDÄ BÄRGÄ möglich sii.das wär ächt phat!

wänn ez da na ganz viel lüüt shriibed, das si sowas au cool findä würäd,und zu so öpisäm id lenzerheid cho würäd, wär viellicht sho was möglich...

peez

Sheikong
07.12.2003, 15:36
hey! d'lenzerheid isch es genials wintersportgebiet!
würd sofort anächo, wenn dört mal so öppis abgah würd.

FLINN
08.12.2003, 11:11
openning party hotel eden: 10.12.2003 Tafs arosa

03.03.2004 soundkolonee hotel eden arosa

prophet
08.12.2003, 11:43
vo däm här söt ja äigäntli au was wiä HIPHOP OPENAIR IDÄ BÄRGÄ möglich sii.das wär ächt phat! geniali idee... ich wär sofort uf de pischte!
peeeez

Sheikong
09.12.2003, 15:14
ooops, fragä mi grad wo ds statement vom räscht vo dä rapagfrässenä wintersportler blybt.
cha ja wohl nid si, dass süsch niemer meh id bärgä geit vo üsnä aightgenossen.
oder hani mr mit däm thema öppä doch ä griff id schissi gleischtet???

mary
13.12.2003, 18:06
huh, das xeht ja würkli shlächt us.

also wänn nu zwei personä a hiphop idä bärgä interessiärt sind,bringtsäs glaub nid,wäni das bi dä lenzerheide bergbahnen mal vorshlahn.

shad.i ha dänkt,dasäs da ä langi listä vo lüüt git,wo sowas cool fänded.dänn hetti diä chönä usdrucke und äm marketingteam under d nasä legä.wänn s interessä da wär,würäd diä sichär was machä...

abär so wiäs usxeht ish s intressä nid da...naja, bis am dunstig chöndär mi na vom gägätäil übärzüügä.dänn xehni diä lüüt vom marketing,und dänn hetäds viellicht na gnuäg ziit sowas uf diä saison anä z organisiärä...also looosss!!!!
eui mäinig?

peez.

clauster
13.07.2006, 03:04
bure!

Jimi Jones
13.07.2006, 03:24
Original geschrieben von clauster
bure!

Nostalgiker

cöri
13.07.2006, 03:41
also ich fänds doch rächt gechillt, wär ja voll de service, bekhunnsch grad alles zäme ;)

VJP
13.07.2006, 11:13
i wär scho froh wenn's ds Bärn mau widr öppis bruchbars gäb.
Bärgä isch für'd Schteiböck.